அமெரிக்காவின் வெளிவிவகாரத்துறை அமைச்சராக ஹிலாரி கிளிண்டன் பதவி வகித்து வருகிறார்.

இவருடைய பதவி காலம் முடிவடைவதையொட்டி, புதிய வெளிவிவகாரத்துறை அமைச்சரை தெரிவு செய்யும் பணியில் ஜனாதிபதி ஒபாமா ஈடுபட்டு வந்தார்.

இந்நிலையில் முன்னாள் ஜனாதிபதி வேட்பாளரும், வெளிவிவகார கமிட்டி செனட் உறுப்பினருமான ஜான் கெர்ரியின் பெயரை ஒபாமா பரிந்துரைத்துள்ளார்.

ஒபாமாவின் நிர்வாகத்தின் கீழ் பல்வேறு உலக நாடுகளுக்கு பயணம் செய்துள்ள ஜான் கெர்ரி, அமெரிக்காவுடன் அதிருப்தி கொண்டிருந்த பல நாடுகளுடனான உறவை சீர்படுத்த பெரும் பங்காற்றியுள்ளார்.

குறிப்பாக அல்கொய்தா இயக்கத் தலைவர் ஒசாமா பின்லேடன், சுட்டுக் கொல்லப்பட்டப் பின்னர் பாகிஸ்தான்-அமெரிக்கா இடையிலான கசப்புணர்வை மாற்ற ஜான்கெர்ரி பெரும் பங்காற்றியுள்ளார் என்பது குறிப்பிடத்தக்கது.

எனவே இவரை வெளிவிவகாரத்துறை அமைச்சராக நியமிப்பதற்கு குடியரசு கட்சி மற்றும் ஜனநாயக கட்சி நாடாளுமன்ற உறுப்பினர்கள் ஒருமனதாக ஆதரவு அளிப்பார்கள் என மூத்த அதிகாரி ஒருவர் கருத்து தெரிவித்துள்ளார்.