பிரிட்டன் இளவரசி கேத் மிடில்டன் கர்ப்பத்திற்காக அனுமதிக்கப்பட்டிருந்த மருத்துவமனையில் செவிலியராக வேலை பார்த்து வந்தவர் ஜெஸிந்தா.

அப்போது அவுஸ்திரேலியாவை சேர்ந்த வானொலி நிலைய அறிவிப்பாளர்கள், அரச குடும்ப உறுப்பினர்கள் போன்று பேசி கேத் குறித்த தகவல்களை சேகரித்தனர்.

அறிவிப்பாளர்களுக்கு, கேத் அனுமதிக்கப்பட்டிருந்த வார்டுக்கு தொலைபேசி இணைப்பை ஏற்படுத்தி கொடுத்தது ஜெஸிந்தா தான் என தெரியவந்தது.

இதனையடுத்து மன உளைச்சலில் ஜெஸிந்தா தூக்கு போட்டு தற்கொலை செய்து கொண்டார். இந்த சம்பவம் உலகம் முழுவதும் அதிர்வலைகளை ஏற்படுத்தியது.

இதற்கு காரணமான அவுஸ்திரேலிய வானொலி தொகுப்பாளர்களான மெல் கிரெய்க் மற்றும் மைக்கேல் கிருஸ்டியன் ஆகியோருக்கு எதிராக கண்டனக் குரல் எழுந்து வருகிறது. இதுகுறித்து பிரிட்டன் அரச நீதி விசாரணைக்குழு விசாரித்து வருகிறது.

இந்நிலையில் ஜெஸிந்தா தற்கொலை குறித்து அரச நீதி விசாரணைக்குழு என்ன முடிவு எடுத்தாலும், அவுஸ்திரேலிய வானொலி நிகழ்ச்சி தயாரிப்பாளர்கள் இந்த குற்றச்சாட்டிலிருந்து தப்ப முடியாது என்று லேபர் கட்சியின் நாடாளுமன்ற உறுப்பினர் கீத் வாஸ் கூறியுள்ளார்.

கடந்த வாரம் நியூ சவுத் வேல்ஸ் உயர் பொலிஸ் அதிகாரி ஒருவர், ஜெஸிந்தா தற்கொலை வழக்கில் குற்றம் சாட்டப்பட்டுள்ள வானொலி நிகழ்ச்சி தயாரிப்பாளர்கள் தப்பிக்கக் கூடும் என்று கூறியிருந்தது குறிப்பிடத்தக்கது.